बारामती नगरपालिकेच्या योगासन प्राणायाम प्रशिक्षण शिबिराची सांगता

बारामती नगरपरिषदेच्या महिला व बालकल्याण विभागातर्फे प्रतिभा महिला प्रशिक्षण योजना २०२५-२०२६ अंतर्गत महिलांसाठी गेल्या दोन महिन्यांपासून चालू असलेल्या मोफत योगासन प्राणयाम प्रशिक्षण शिबिराचा समारोप करण्यात आला. समारोप प्रसंगी नगरपालिकेच्या महिला व बाल कल्याण अधिकारी सौ सोनाली राठोड, सहय्यक सौ स्वाती सोनावणे, तालुका क्रीडा अधिकारी महेश चावले उपस्थित होते. मान्यवरांच्या हस्ते योग प्रशिक्षण यशस्वीपणे पूर्ण केलेल्या महिलांना प्रमाणपत्र वाटप करण्यात आले. एकूण १०० महिलांनी या प्रशिक्षण शिबिरामध्ये सहभग नोंदविला. बारामतीतील जीवनविद्या योग आयुर्वेद फौंडेशन च्या माध्यामतून सदर शिबिराला डॉ निलेश महाजन व डॉ भक्ती महाजन यांनी प्रशिक्षण दिले. 

सदर शिबिरामध्ये योगासने , प्राणायाम , धारणा , ध्यान, सूर्यनमस्कार आणि त्याचे विविध प्रकार यांचे  प्रशिक्षण शास्त्रोक्त प्रशिक्षण देण्यात आले. 

संपूर्ण कुटुंबाच्या आरोग्याची धुरा घरातील स्त्रीवर असते, त्यामुळे महिलांनी स्वत:च्या आरोग्याकडे लक्ष देणे आवश्यक आहे. त्यासाठी योगसाधना करणे आवश्यक आहे. या योग शिबिराचाही आरोग्याच्या दृष्टिकोनातून अनेक महिलांना लाभ होत आहे. मुख्याधिकारी श्री पंकज भुसे यांच्या माध्यामतून बारामती नगरपालिकेतर्फे महिलांना सक्षम करण्यासाठी नावीन्यपूर्ण उपक्रमांचे आयोजन करण्यात येते. पुढेही आरी वर्क, पाककला असे अनेक उपक्रम सुरु आहे. तरी महिलांनी याचा लाभ घ्यावा. असे मत महिला व बाल कल्याण अधिकारी सौ सोनाली राठोड यांनी व्यक्त केले. 

  नियमित योग केल्याने शरीरामध्ये ऊर्जा निर्माण होते, स्नायूंची कार्यक्षमता वाढते, मन प्रसन्न होते त्यामुळे महिलांनी नियमीत योग करावा. महिला या संपूर्ण कुटुंब व्यवस्थापन करीत असतात,त्यासाठी त्यांनी स्वतःच्या आरोग्याची काळजी घेणे हे ही महत्वाचे आहे. नियमित योग केल्याने मासिक पाळीच्या तक्रारी, हार्मोन चे असंतुलन, शारीरिक थकवा कमी होऊन आरोग्य सुधारते असे मत शिबिराच्या प्रमुख मार्गदर्शिका डॉ भक्ती महाजन यांनी व्यक्त केले.

 याशिबिरा दरम्यान तालुका क्रीडा अधिकारी महेश चावले, महिला व बाल कल्याण विभागाच्या प्रमुख सोनाली राठोड सौ स्वाती सोनावणे यांनी भेट दिली.

शिबीर यशस्वी करण्यासाठी नगरपालिकेच्या  स्वाती सोनावणे, योग महाविद्यालयाचे सचिन रणमोडे,डॉ श्वेता जाधव, अश्विनी वायसे, नंदिनी खोमणे यांनी सहकार्य केले.